UMMAT E MUSLIMA KA MAUJOODAH HAAL----EK NAZAR

Bismillahirrahmanirraheem

 

 UMMAT E MUSLIMA KA MAUJOODAH HAAL----EK NAZAR

Picchle Kuch Saalon Se "Jodh (+), Ghataao (-) Aur Zarb Taqseem" Par Tahqeeqi Maqaala Likh Raha Tha,

Us Maqaala Ke Kuch Aqtabaas Istefaada Aam Ke Liye Haazir Khidmat Hain,

Azaadi Ko 66 Saal Ho Chuke Hain, In 66 Saalon Me Musalman Mashkook Aur Deen Ke Pa'band Dahshatgardi Ki Alaamat Thahre,

Mulk Me Lagbhag 60,000 Firqa'warana Fasaad (Communal Riot) Hue, Nuqsaanaat Musalmano Ke hue, Bewagi Aur Yateemi Aur Jail Ki Salaakhen Musalmano Ke hisse Me Aayi, Fasaadi Azaad Ghoomte Rahe,

Jin Logon Ne Azaadi Ke Liye Apni Jaane Qurbaan Ki Thi, Un Par Mulaazimat (Govt. Service) Ke Darwaaze Band Ho Gaye,

Musalmano Ne Khwaab Dekhna Chhod Diya Mulazimat Haasil Karne Ka, Engineer ; Docter Banne Ka, San'at'kaar Aur Fan'kaar Banne Ka , Saare Khwaab Chakna'choor Ho Gaye,

Fauji Mulazimat Ka khwaab Adhoora Rah Gaya, Kyunke Pakistani Tanks Se Takra Kar Shaheed Hone Waale Abdul Hameed Jaise Jaan'baaz Ki Bewa Rasoolan Bibi Insaaf Haasil Karne ke Liye Khud'kushi Par Majboor Ho Gayi, Unke Pote par Fauj Ka Darwaaza Band Ho Gaya,

Mughal Baadshah Bahadur Shah Zafar Ki Pad'poti Kolkata Ki Sadkon Par Chaaye (Tea) Ki Dukaan Chalaane Par Majboor Hui,

Tipu Sultan Ke Waariseen Rickshaw Chalaane Par Majboor Hue, Unki Dast'giri Ke Liye Na Toh Arbab Hukumat Aage Aaye Aur Na Muslim Qaum Ke mAmtool Hazraat Ne Pahal Ki,

Musalmano Ne Engineer Banne Ka Khwaab DekhNa Chhod Diya Ke Kafeel Ahmad Engineer Hai Aur Dahshat'gard Bhi,

Docter Banne Ka Khwaab Chhod Diya Ke Mohd Haneef Docter Hai Aur Dahshat'gard Bhi,

Fankaar Banne Ka Khwaab Chhod Diya Ke M.F Hussain Fankaar Hai Aur Hindu Devion Ka Dushman Bhi,

Chartered Accountant Banne Ka Sapna Chhod Diya Ke Memon Brother Chartered Accountant Hai Aur Dahshat'gard Bhi,

Kisi Muslim Tanzeem Me Judhne Ka Khwaab Chhod Diya Ke FAlaahi Tanzeem Bhi Ho Aur Dahshat'gard Bhi........

Musalman Apne Tamam Quwwat Wa Tawaanai Se Mahroom Ho gaye,

Na'maloom Khauff Ke Hisaar Me Qaid Aur Mustaqbal (Future) Ki ghair Yaqeeni Soorat e Haal Me Mahsoor.....

Musalman Har Satah Par Pas'maandgi Ka Shikaar Ho Gaye,

Aksariyat Ke Hasad Wa Taassub Ka Shikaar Ho Gaye Aur Ye Sacchar Committee Ne Hindustanion Ke Saamne Zaahir Kar Diya...

Azaadi Ke 66 Barson Me Kya Kuch Nahin Hua, Har Roz, har Hafta Aur Har Mahieena Musalmano Par Zulm, Ijtemaai Asmat'dari (Gang Rape), Bacchiyon Ke Saath Wahshiyaana Sulook, Masjid Me Bam Dhamaake, Traino Me Dhshat'gardi, Aur Har Jurm Ki Saza ke Liye

"Musalman Hain Na !"

Ka Formula Apnaaya Gaya...

Is Tarah Ke Waaqeyat Me Rozaana Nayi Ziyaadatiyan Jodi Jaati Rahin,

Kabhi Koi Committee Banakar Musalmano Ko Gumraah Karke Use Sabz'baagh Bhi Dikhaya Jaata Raha, Aur Aaj Bhi Jaari Hai,

Azaadi ke 66 Barson Me Y e Bhi Hua Ke Hamare Aansuo Ke Rang Badal Gaye, Hamare Khoon Me Safedi Aa gayi, Islami Akhwat K Maana Badal Gaya, Deeni Shinaakht Ka Nazariya Dhundhla Padh Gaya,

Akhlaaq Wa Kirdaar Ke Hudood Mit Gaye, Khud'gharzi Aur Anaad Ki Jung Ke Nakkaare Bajne Lage,

Muqallid Wa Ghair Muqallid Jaise Istelaahaat Ne Janam Liya, Musalman Apna Hi Girebaan Chaak Karne Lage, Ek Dusre Ko Islam Se Khaarij Hone Ka Fatawa Jaari Karne Lage,

Hamari MasjidEn Dusre Maslak Ke Namazion Ke liye Band Ho Gayi, Aapas Ke Azdawazi (Married) Rishtey Paamaal Hone Lage,

Gumraah, Munaafiq, Aur Yahoodion Ke Aaalakaar Jaise Alqaabaat Dusron Ke Sar Mundne Lage,

Kabhi Sunni Wa Shia Ke Naam Pe, Kahin Deobandi Aur Barelwi Ke Naam Par Apne Bhaiyyon Ka Khoon Bahaane Lage,

Hamari Masjiden Alag Ho Gayin, Ab Qabrastan Alag Ho Rahen Hain, Aur Membaron Ke Zariye Bahimi Akhtelaafaat Ko Hawa Di Ja RAHI hai,

Kahin Fiqr Wa Aqeede Ke Akhtelaafaat Hain Toh Kahin Maslaki Jamaaton Aur Tanzeemo Ke Darmiyaan Dooriyan Hain Toh Kahin Zaat (Caste) Wa Pesha Ki BUNIYAAD par Inteshaar Wa Afteraaq Hai,

Hyderabad Ke Roznama "Etmaad" 12 August 2007 Ba'hwala Maah'nama "Raah Etedaal" October 2007 Ka Ek Aqtabaas Padhiye...

Gujraat Ke Shaher Rajkot Ki Ghareeb Nawaaz Masjid Ke Darwaaze Par Ye Board Laga Hai

"Ye Masjid Ahle Sunnat Wal Jamaat Ki Hai, Isme Tableeghi, Wahabi, Deobandi Aur Deegar Firqe Ke Logon Ka Daakhila Mamnu Hai"

Ye Koi Numaishi Board Nahin Hain Balke Is Par Shakhti Se Amal Bhi Ho Raha Hai,

Is Qism Ki Paabandiyan Kisi Ek Masjid Tak Madood Nahin Hain Balke Deegar Masajid Me Bhi Yahi Afsosnaak Amal Ho Raha Hai Jiska Talkh Tajurba Gujasta Dino Special Reserve Police Ke Musalman Commander Ko Us Waqt Hua Jab Wah Rajkot Se 30 Km Door Kondal Ilaaqa Ki Ek Barelwi Masjid Me Namaz Ke Liye Gaye, Jab Masjid Ke Muta'alliqqeen Ko Maalum Hua Ke Ye Shakhs Deobandi Maslak Se Talluq Rakhte  Hain Toh Unhe Wahan Namaz Padhne Ki Ijaazat Nahin Di Gayi, Usse Chand Dino Pahle Usi Shaher Ki Ek Dusri MasjiD Me Ek Musalman Sub Inspecter Aur Ek Judge Ko Inhi Buniyaadon Par Namaz Padhne Se Rok Diya Gaya Tha...

Janab Sayyid Ali Sahab 30 September 2007 Ko Raashtriya Sahara New Delhi Me

"Ham Ek Hain Magar Maslak Alag Alag" Ke Unwaan Se Likhte Hain

"Maslaki Fitna'angezi Ka Taaza Sharm'naak Waaqeya Sultanpur Ke Nawaah Ka Hai, Khabar Ke Mutaabi ek Maslak Ke Imam Sahab Ne Ek Mayyid Ki Namaz e Janaza Padha Di Toh Unke Peeche Namaz Padhne Waalon Ke Khilaaf Ek Fatawa'farosh Molwi Ne Maslaki Ikhtelaaf Ki Buniyaad Par De Diya Ke Tamam Muqtadion Par Unki Biwiyan Haram Ho Gayin, Unko Dobara Nikaah Padhna Hoga Kyunke jis Maslak ke Imam Ne Namaz e Janaza Padhaai Uska Aqeeda Motbar Nahin Wah Kaafir Hai...... "

Is Man'pasand Khabar Ko Hasab Riwaayat Ko Media Ne Khoob Uchhaala,

Hazrat Mufti Sahab Screen Par Aaye Aur Saari Duniya Ko Aagaah Kiya Ke Musalmano Me 72 Firqe Hain Unmese Sirf Hamare Maslak Ko Chhodkar Sab Kaafir Hain,

Ek Dusri Khabar Rajasthan Ke Jodhpur Se Aayi Hai Wahan Bohra Firqe Ke Do Girohon Me Ek Masjid ki Imaamat Ke Liye Fasaad Ho Gaya, Mera Imam nahin Toh Namaz Nahin Hogi, Na padhenge Na Padhne Denge,

Masha Allah Is Imaan Wa Aqeedah Ke Liye Jihaad Shuru Ho Gaya, Jam kar Maar Peet hui, Eent Patthar Chale, Kitne Hi Zakhmi Ho Gaye, Soorat e Haal Itni Bigad Gayi Ke Police Ko Mudakhilat Karni padi, Aur Us Ilaaqe Me Curfew Naafez Karna Pada, Do Girohon Ki Taqraar Me Ramzaan Jaisa Muqaddas Maheena Me Bhi Masjid Sooni Ho Gayi,

Chand Baras Pahle Ramzaan Me Bhi Siliguri Se 30 Km Door Burhaan Nagar Ki Khabar Hai Ke Wahan Namaz Ki Tadaad Rakaat Par Jhagda Ho Gaya....

Ke Juma Ki Namaz Aur Subah Ki Namaz Me Rakat Ki Taadad Kitni Hai ??

Naubat Maar'peet Ki Aa Gayi, Is Maar'peet Ki Zad Me Ek Bacha Ki Maut Ho Gayi, Dozen Bhar Log Zakhmi Ho Gaye Aur 8 Log Giraftaar Hue

Ek Aur Ramzaan Ke Maheene Hi Ki Baat Hai Uttar Pradesh ke Orai Shaher Me Do Alag Alag Maslak Ke Log Aapas Me Ladh Pade,

Ek Maslak Waale Ne Dusre Mukhaalif Maslak Ke Do Ulema Ko Goli Maar Kar Seedha Jannat Pahuncha Diya,

Ek Maulana Ka Taalluq Deobandi Maslak Se Tha Aur Dusra Barelwi Maslak Se, Magar They Dono kalimah Go,

Deobandi Maulana Sahab Fajr Ki Namaz Ada Karke Masjid Se Nikal Rahe They Ke (Shikaar Ki) Taak Me Baithe Ghaariyaan Ne unKo Goli Maar Kar Halaaq Kar Diya,

Bhala Ye Kaise Mumkin Tha Ke Is Muqaddas Jihaad Me Shaheed Hone Waale Imam Sahab Ki Taraf Se Mujaahideen Inteqaaman Khoon Ka Badla Khoon Aur Maulana Ka Badla Maulana Se Na Lete,

Mujaahideen ki Rapid Action Force Fauran Harqat Me Aa Gayi Aur Barelwi Maslak Ke Maulana Ke Ghar Me Ghuskar Goli Maar Kar halaaq Kar Diya, Jhagda Masjid Par Qabza Ke Liye Chal Raha Tha.

17 april 2005 Ko Jamia shariya Faiz Ul Uloom Saraaye Meer Azamgarh Me 

"Do Rozah Taqleed Aimma Conference " Ka in'eqaad Hua tha,

Maulana Haseeburrahman Azmi ne Farmaya Tha Ke

"Ghair Muqallideen Ka Fitna Ulema Aur Oola Al Amr Se Awaam Ka Rishta Muntaqa Karne Ki Ek Mazmoom Shaazish Hai, Tamam Muhaddiseen Muqallid Ya Mujtahid Rahe Hain, Koi Ek Muhaddis Bhi Ghair Muqallid Nahin Raha Hai"

Maulana Abdul Mu'eed Fatehpuri Ne Kaha Tha Ke

"Shiyyat Se Ahle Hadithon Ka Qareebi Taalluq Hai; Unke Masail Kitab wa Sunnat Aur Jamhoor Ummat Ke Khilaaf Hain"

Maulana Mateen Ul Haq Osama Qasmi Kanpuri Ne Farmaya Tha Ke

" Ghair Muqallideen Quraan Ka Ek Tarjuma Karne par Qaadir Nahin Hain, Bukhaari Shareef De Di Jaaye Toh Ek Hadith Bhi Nahin Nikaal Sakenge, Ye Yahoodi Mission Ka Ek Hissa Hai Aur Yahoodion Ke Agent Ke Taur par Kaam Kar Rahen Hain"

Us Conference me 4 Tajaweez Manzoor Ki Gayi

1- Jamat Ahle Hadith (Ghair Muqallideen) Ek Firqa Hai Jo Ijma Sahaba ka Munkar Hai,

2- Ahle Hadithon ke Masail Kitab Wa Sunnat Aur Jamhoor Ummat Ke Khilaaf Hain

3- Logon Se Apeal Ki Gayi Ke Ahle Hadithon Se Shadi Biyaah Ka Rishta na Jodha Jaaye,

4- 3 Talaq Ek Majlis Me Di Gayi ho Ya Mutfarq Soorat Me Teen Talaq Hi Hongi, ek Nahin

(Toh Ye Hai Ummat Ki Maujoodah Soorat E Haal)

Aise Pur'aashob Daur Me Jab Hindustan Ki Fistaayi (Saffaron) Taqatein Musalman ke Khilaaf saajisheon Me Lagi Hui Hai,

America Aur Israel Muslim Ummat Ko Baatne Me Jute Hue Hain,

MOSSAD Aur CIA Maslaki Fasaad Ko Hawa Dekar Muslim Nau'jaawaon Ke Zehan Ko Zehar'aaludah Kar Rahen Hain,

Kya Ye Munaasib Hai Ke Ummat Oonch Neech, Deobandi, Barelwi, Muqallid, Ghair Muqallid Ke Khaano Ne Bate Rahen,

Ikhtelaaf Toh Sahaba Kiram (ra) Ke Darmiyaan Bhi Hota Tha, Wah Ummat Ke Liye Rahmat Saabit Hote They, Aur Un Masail Ko Lekar Ladaai Jhagda Nahin Karte They,

Ek Dusre Ke khilaaf Fatawa Nahin Daaghte They,

Ikhtelaaf 4 Imam Aur Muhaddiseen Ke Darmiyaan Bhi Raha HaI Lekin Kisi Imam Ya Muhaddis Ko Bura bhala Kahne Ki Jasaarat Nahin Ki,

Kisi ne Bhi Dusre Ke Khilaaf Kufr ka Fatawa Jaari Nahin Kiya, Har Ek Ne Dusre Ka Ehteraam Kiya...

Wah Musalman Jo Kabhi Baatil Ka Dushman Tha, Aaj Apne Bhaiyyon Ka Dushman Ho Gaya,

Wah Musalman Jo Kabhi Tajmahal, Lal Quila. Al Hamra, Jamia Azhar Aur Kutub Minaar Taameer Karta Tha, Ab Dusre Musalmano Ki Izzat Wa Namood Aur Jaan Wa Maal Par Hamla Kar Raha Hai,

Apne Maslak Ke Liye Jihaad Kar Raha Hai,

Masjid Ke Naam Par Ladh Raha Hai,

Kya Is Ummat Ko Isi Liye Uthaaya Gaya Tha ???

Kya Is Ummat Ki Qismat Ab Siyaasi Jodh Ghataao Aur Zarb Taqseem Tak Hi Mahdood Rahegi ????

Allah Hamen Haq Baat Kahne Aur samjhne Ki Taufeeq De..... Aameen