BINA'WAJAH ROZA NA RAKHNA GUNAAH KABEERA HAI

Bismillahirraheem




BINA'WAJAH ROZA NA RAKHNA GUNAAH KABEERA HAI:



Roza jis tarah pahli ummaton par farz raha hai, usi tarah ummat e muhammadia par bhi farz hai,

khaane peene aur jinsi khwaahisaat poori karne se rokne ka maqsad insaan me taqwa aur allah ka darr paida karna aur dusron ki mushkilaat wa pareshaanion ka ahsaas dilaana hai,

isliye roza maah e ramzaan me farz qaraar diya gaya, balke bahut saare mauqon par nafil roza rakhne aur uske ahtemaam ki targheeb dilaayi gayi, jinke liye allah taala ne buland darjaat, maghfirat aur ajar azeem ka intezaam kiya hai, unki khoobiyon aur awsaaf me deegar nek kaamon ke elaawa roze ka bade ahtemaam se zikr kiya hai,

chunanche farmaya:-" yaqinan jo mard aur jo aurtein muslim hain, momin hain, mutee wa farmabardaar hai, raast baaz hain, saabir hain, allah ke aage jhukne waale hain, sadqah dene waale hain, roza rakhne waale hain, apni sharmgaahon ki hifaazat Karne waale hain, aur allah ko kasrat se yaad karne waale hain, allah ne unke liye maghfirat aur bada ajar muhayya kar rakha hai "


roza agar ek taraf hausla , sabr aur nafs ammarah par ghalbah paane ki amli tarbiyat hai, toh dusri tarah ajar azeem maghfirat aur shafaat akharwi ka samaan hai, uske saath saath khawaahisaat par qaabu paane ka bahtareen ilaaj bhi hai,

neeche likhi jaane waali hadith ki roshni me ye sab baatein roz e roshan ki tarah waazeh ho jaati hain,

nabi e akram sallaho alaihi wasallam (pbuh) ne farmaya:-" roze dhaal hain, banda un rozon ke zariye aag se bachaao ka saamna kar leta hai "

aur farmaya:-" aiy naujawano ! Tum mese jiske paas istetaa'at ho wah shaadi kar len, kyonke nikaah nigaah nichi rakhne me bada ma'aawin hai, sharmgaah ki hifaazat ka bahtareen samaan hai, aur jiske paas nikah ki iste'taa'at na ho wah paabandi se roze rakhe, roza uski shahwat ka bahtareen taryaaq hai"

Roze ka ahtemaam insaan ko jahannum ki aag se koson door kar deta hai.



nabi e akram sallaho alaihi wasallam (pbuh) ne farmaya:-" jo banda ek din allah ki raah me roza rakhega, allah taala us ek din ke badle me uska chehra 70 saal ke liye jahannum se door kar dega"

(fiqh us sunnah page 365)


roza aisa nek amal hai jo insaan ko jannat tak pahuncha kar rahta hai,

hz abu umama (ra) bayaan karte hain ke nabi e akram sallaho alaihi wasallam (pbuh) ne farmaya:-" roze ka ahtemaam karo, us jaisa koi dusra amal nahi"

roza un azeemul murattab kaamon mese hai jo qayamat ke roz shifaarish karega aur uski shifaarish baargaah e khuda wandi me qubool bhi hogi,


nabi e akram sallaho alaihi wasallam (pbuh) ne farmaya:-" roza aur qur'an qayamat ke roz bande ke haq me shafa'at karenge, roza kahega:- aiy parwardigaar ! Maine ise khaane aur sahwat poori karne se roka tha, lihaaza iske haq me meri shafa'at qubool Farma le, quraan kahega:- maine ise raat ko sone nahi diya, lihaza meri shafaat iske haq me qubool farma le, nabi e akram sallaho alaihi wasallam (pbuh) ne farmaya:- pas un dono ki shafaat qubool kar li jaayegi "

(rawaah ahmad)
har nek kaam ka ajar wa sawaab allah taala ke yahan 10 guna se lekar 7 guna tak hai, lekin roze ka ajar wa sawaab bila hisaab hai,



nabi e akram sallaho alaihi wasallam (pbuh) ne farmaya:- har insaan ka amal badhaaya jaata hai, neki ka badla 10 guna se lekar 7 guna tak hai,"

allah taala ne farmaya:-" albatta roze ka masla mukhtalif hai, kyonki wah mere hi liye hai aur main hi uska badla dunga"

"roza meri khaatir apni khwahisaat aur khaana chhod deta hai, rozedaar ke liye do khusiyan hain, ek khushi iftaar ke waqt aur dusri khushi apne rabb se mulaqaat ke waqt, aur rozedaar ke muh ki na'pasandidah bu, allah taala ko mushk se zyada azeez hai "

(rawaah bukhari)
ye hain Chand manaqib wa fazail jo roze ke zaman me kitabullah aur sunnat rasoollullah nabi e akram sallaho alaihi wasallam (pbuh) me bayaan hue hain,


is sabko jaan lene ke baad bhi koi bad'naseeb aur qismat ka maara huwa apni aakhirat na sanwaare balke sehat mand, tandrust aur tawaana hone ke ba'wajood roze na rakhe to yaqinan wah nabi e akram sallaho alaihi wasallam (pbuh) ki bad'dua ka mustahiq hai,


nabi e akram sallaho alaihi wasallam (pbuh) ne jibreel ameen ke kahne par uske khilaaf bad'dua ki, jiski tafseel kuch yun hai


hz abu hurairah (ra) bayaan karte hain ke:- "nabi e akram sallaho alaihi wasallam (pbuh) ne mimber par chadhte hue 3 martaba ameen, ameen, ameen kaha, kisi ne wajah daryaaft ki ke- ya rasoollullah !aap ne mimber par chadhte hue aameen, ameen, ameen kaha, uska kya sabab hai?

Aapne farmaya:- jibreel ameen (as) ne mujhse aakar kaha:-" jis aadmi ne ramzaan ka mahina paaya, phir bhi Uski bakhsis na ho saki aur nateejatan wah aag me daakhil ho gaya toh allah use halaaq wa barbaad kare aur apni rahmat se mazeed door kare...

Jibreel (as) ne kaha:-" aap aameen kahen, toh maine aameen kahi "


ramzaan ul mubarak ka farz roza na rakhne waala sabse pahle is bad'dua ki zad me aata hai, aur wah log bhi us bad'dua ke asar se mahfooz nahi rah sakte jo ramzan ul mubarak ki sunahri mauqa se faayeda nahi uthaate. Balke uske aadaab wa ahkaam ki khilaaf'warzi karke mazeed wabaal apne sar lete hain,

ahkaam wa aadaab ramzaan me la'parwahi ka jo anjaam nikal sakta hai, woh darj zeil hadith me bahut waajeh hai,


nabi e akram sallaho alaihi wasallam (pbuh) ne farmaya:-" main so raha tha ke mere paas do aadmi aaye (jo haqiqat farishte they) wah mera baazu pakad kar na'hamwaar pahaad ke paas le aaye aur kaha:- uper chadhiye, maine kaha:- maine aise pahaad par nahi chadh sakta,

unhone kaha:- ham Raasta aapke liye hamwaar kiye dete hain, chunanche main chadh gaya,

jab main pahaad ki choti par pahuncha toh wahan maine bahut pur shor awaaz suni, maine daryaft kiya:- ye kaisi aawaazein hain ?

Unhone bataya:-" ye jahannum waalon ki cheekh wa pukaar hai, phir wah mujhe lekar aage chal pade, kya dekhta hun ke kuch log aidiyon se bandhe hue aundhe muh latke hue hain aur unke jabde chire hue hain, jinse khoon bah raha hai,

maine poocha:- ye kaun log hain ? Farishte ne kaha:-" ye wah log hain jo waqt se pahle roza aftaar kar lete hain "


ghaur farmaayen ke agar kabl az waqt roza aftaar karlene waale ki ye saza hai, jaise ke nabi e akram sallaho alaihi wasallam (pbuh) ne mushaaheda farmaya,

to bilkul roza na rakhne waalon ki haalat kaisi hogi ?

Bas itni baat par ghaur aur tawjjoh kar lene se saari haqeeqat samjh me aasakti hai, basharte ke dil wa dimagh sochne ke qaabil ho aur dil murdah na ho chuka Ho...


ALLAH TAALA HAMEN HAQ BAAT KAHNE AUR SUNNE KI TAUFEEQ DE... AUR KISI BHI BAAT PAR AMAL KARNE SE PAHLE TAHQEEQ KARNE KA JAZBA PAIDA KARE.......AMEEN